Azərbaycan, Bakı, 23 iyun /Trend, müxbir N.İsmayılova/
Beynəlxalq Maliyyə Korporasiyasının (BMK) "Azərbaycanda və Orta Asiyada maliyyə infrastrukturunun gücləndirilməsi" layihəsi (ACAFI) çərçivəsində daşınan əmlak reyestri yaradılacaq. Bu barədə cümə axşamı BMK-nın Azərbaycandakı əlaqələndiricisi Teymur Heybətov məlumat verib.
"Daşınan əmlak reyestri özündə artıq qeydiyyatdan keçmiş, məsələn, avtomobillər, müxtəlif texnika növləri istisna olmaqla, daşınan əmlakın bütün növləri haqqında informasiyanı ehtiva edəcək", - Heybətov bildirib.
Onun sözlərinə görə, 2008-ci ildə USAID-in yardımı ilə daşınan əmlak üzrə qanun layihəsi hazırlanıb. BMK qanun layihəsinin irəliləməsi və onun qəbul edilməsi məqsədilə işləri bərpa etməyi və İqtisadi İnkişaf Nazirliyi və ölkənin Mərkəzi Bankı ilə danışıqlara başlamağı qərara alıb.
"Ehtimal olunur ki, belə reyestrin hazırlanması maliyyə institutlarına girovla kreditlərin verilməsi zamanı təhlilin yaxşılaşdırılmasına kömək edəcək, eləcə də lizinq şirkətlərinin fəaliyyətinə müsbət təsir edəcək", - o deyib.
Heybətovun sözlərinə görə, habelə, bu reyestrin hansı dövlət strukturunun yanında fəaliyyət göstərəcəyini müəyyən etmək lazımdır. Dünyada müxtəlif təcrübədən istifadə olunur və reyestrlər Mərkəzi Bank, Maliyyə Nazirliyi və daşınmaz əmlak reyestri yanında fəaliyyət göstərir.
"Bütün məlumatlar onlayn rejimdə işlənəcək. Digər ölkələrin təcrübəsinə görə, bu reyestrin göstərdiyi xidmətlər adətən pulsuz olur", - o deyib.
ACAFI layihəsinin məqsədi Orta Asiyada (Qırğızıstan, Tacikistan və Özbəkistanda) və Azərbaycanda maliyyə institutlarının əməkdaşları arasında risklərin idarə olunması sahəsində kredit məlumatları mübadiləsinin effektiv sisteminin yaradılması və təkmilləşdirilməsi, peşəkar təhsil və sertifikatlaşdırılmanın tətbiqidir. Layihənin fəaliyyət göstərməsi maliyyə idarələrinə daha sürətli və düzgün kredit qərarlarının qəbulunda yardım edir və beləliklə, özəl istehlakçılar, eləcə də regiondakı kiçik və orta müəssisələr üçün maliyyə xidmətlərinin əlverişliliyini artırır. İndiki üçillik layihə İsveçrə hökuməti ilə əməkdaşlıq çərçivəsində həyata keçirilir.
