Azərbaycan, Bakı, 25 iyul /Trend, müxbir A.Axundov/
Azərbaycanın sığorta şirkəti "AzSığorta" nizamnamə kapitalını 2011-ci ildəki fəaliyyətinin yekunları üzrə əldə etdiyi mənfəət hesabına artırmağı planlaşdırır. Bu barədə şirkətin idarə heyətinin sədri Abbas Babayev bildirib.
"Ötən il biz 5-6 milyon manat səviyyəsində mənfəət əldə etmişdik. Biz belə göstəriciyə bu il də nail olacağımıza ümid edirik. Bütün mənfəət kapitallaşmaya yönəldiləcək", - Babayev bildirib.
Bu il "AzSığorta" səhmlərin nominal dəyərinin artırılması yolu ilə nizamnamə kapitalını iki dəfədən çox, yəni 4 milyon 644 min manatdan 9 milyon 446 min manatadək artırıb.
2010-cu ilin yekunları üzrə "AzSığorta" şirkətinin aktivləri ilin əvvəlindəki 10,763 milyon manata qarşı 18,935 milyon manat təşkil edib.
2010-cu ildə ödənilmiş nizamnamə kapitalı 4,643 milyon manat, xalis mənfəət - 5,639 milyon manat, bölünməmiş mənfəət - 20,45 min manat olub. Ötən il ərzində şirkıtin ümumi kapitalı 10,66 milyon manat təşkil edib.
"AzSığorta" ASC Azərbaycan sığorta bazarında 2006-ci ilin noyabr ayından fəaliyyət göstərir. Respublikanın əksər böyük şəhər və rayonlarında 7 filial yaradılıb . "AzSığorta" ASC-də 180-dən artıq əməkdaş çalışır. Hazırda "AzSığorta" ASC müştərilərə 5 icbari və 32 könüllü sığorta növləri üzrə yüksək keyfiyyətli xidmət göstərir.
İyulun 25-nə rəsmi məzənnə 0,7865 AZN/USD təşkil edir.