...

Azərbaycanda buğda istehsalı 26 faiz artıb

Biznes və iqtisadiyyat xəbərləri Materials 11 Avqust 2011 13:32 (UTC +04:00)

Azərbaycan, Bakı, 11 avqust /Trend, müxbir İ.Xəlilova/

Kənd Təsərrüfatı Nazirliyinin məlumatına görə, buğdanın əkin sahələri il ərzində 0,5 faiz - 654 197 hektaradək azalıb.

"Avqustun 8-nə olan vəziyyətə görə, buğda 651 551 hektar ərazidə səpilib, halbuki ötən il 655 381 hektar ərazidə işlər görülmüşdü", - nazirlikdən bildirilib.

Ötən illə müqayisədə biçin sahəsi 0,6 faiz azalıb.

Buna baxmayaraq, buğda istehsalı bir il əvvəllə müqayisədə 25,3 faiz artıb. Avqustun əvvəlinə olan vəziyyətə görə, ölkədə 1 635 385 ton buğda yığılıb.

Hər hektar ərazidən orta hesabla 25,1 sentner buğda yığılıb. Bu, 26,1 faizlik artım təşkil edib. Ötən il bu göstərici 19,9 sentner olub.

Bir müddət əvvəl kənd təsərrüfatı naziri İsmət Abasovun dediyi kimi, Azərbaycanda 2011-ci ildə 2,5 milyon ton taxıl istehsalı gözlənilir. Bu, ötən ilin göstəricisini 500 min ton üstələyir.

"Hava şəraiti əlverişli olsa, biz 2,5 milyon ton taxıl istehsalını proqnozlaşdırırıq. Bunun 1,7 milyonu ərzaq buğdasının payına düşəcək", - Abasov qeyd edib.

2011-ci ildə 800 min ton arpa istehsalı planlaşdırılır.

Ötən il ərzində ölkədə 2000,9 min ton taxıl yğılıb. Bu, 2009-cu ildəkindən 33 faiz azdır.

Nazirin sözlərinə görə, bu gün ölkənin taxıla tələbatı 3-3,2 milyon tondur.

"Çatışmayan hissə digər ölkələrdən idxal ediləcək. Hazırda Azərbaycan Rusiya və Qazaxıstandan taxıl idxal edir", - nazir bildirib.

Xəbər lenti

Xəbər lenti