Azərbaycan, Bakı, 10 sentyabr /Trend, müxbir A.Axundov/
Yay aylarında Bakının əmlak bazarında aktivlik ötən ilin müvafiq dövrü ilə müqayisədə 18-20 faiz çox olub. Bu barədə Trend-ə şənbə günü "MBA Group" konsaltinq şirkətinin baş direktoru Nüsrət İbrahimov bildirib.
Onun sözlərinə görə, bu ilin yayında sövdələşmələrin sayı və bazarda stabilləşmə artıb.
"Azərbaycan əmlak bazarının stabilləşdiyini desək, yanılmarıq", - İbrahimov deyib.
Onun sözlərinə görə, payızda bazarın aktivliyi artmağa doğru davam edir ki, bu da alıcıların bazara qayıtması ilə bağlıdır.
O, bildirib ki, bu, istirahət mövümünün başa çatması və yeni dərs ilinin başlanması ilə bağlıdır. Aktivlik, torpaq və ticarət obyektləri bazarı istisna olmaqla, bütün bazar üzrə artır.