Azərbaycan, Bakı, 17 sentyabr /Trend, müxbir A.Axundov/
Azərbaycanda ilin sonunadək sığorta müqavilələrinin bağlanmasında elektron imzadan istifadə etməyə imkan verən hüquqi baza hazırlanacaq.
Prezident İlham Əliyevin "İcbari sığortalar haqqında" qanunun tətbiqinə dair fərmanı Maliyyə Nazirliyinə üç ay müddətində qanunvericiliyə dəyişikliklər edilməsi üçün təkliflərin hazırlanması tapşırığı verilib. Fərmanın və qanunun mətni şənbə günü rəsmi mətbuatda çap olunub.
Həmçinin üç ay müddətində elektron informasiya sistemlərinin sığorta şirkətlərində tətbiqi və sığorta xidmətlərinin elektron vasitələrlə təqdim olunmasının təmini üzrə təkliflər hazırlanmalıdır.
Azərbaycanda elektron rəqəmli imzaların verilməsi sentyabrın yeddisindən başlanıb. Elektron rəqəmli imza ilkin sənədin xüsusi proqram vasitəsilə yenidən təşkil olunması hesabına əldə edilən simvolların müəyyən ardıcıllığından ibarətdir. Göndəriş zamanı rəqəmli imzanın ilkin sənədə əlavəsi həyata keçirilir, nəticədə sənəddə olan məlumatın müəllifliyi və dəyişməzliyi öz təsdiqini tapır.
İlkin sənədə istənilən dəyişikliklərin edilməsilə elektron imza qüvvədən düşür. Rəqəmli imzanın əldə edilməsi internet şəbəkəsi vasitəsilə təşkilatın mübadilə etdiyi sənədlərin müəllifliyi və ehtivasından əmin olmağa imkan verir. Elektron imzanı saxtalaşdırmaq mümkün deyil. Rəqəmli imza ilə imzalanmış sənəd əl imzası ilə imzalanmış sənədə bərabər tutulur.
Bundan əlavə, Maliyyə Nazirliyi aktuari və sığorta vasitəçiliyi fəaliyyətlərinin inkişaf etdirilməsi, korporativ idarəetmə standartlarının təkmilləşdirilməsi məqsədilə qanunvericiliyə dəyişikliklərin əlavə olunması üzrə təklifləri də təqdim edəcək.
"Sığorta fəailiyyəti haqqında" qanuna aktuari işinə dair bütöv bir fəslin əlavə edilməsi təklif ediləcək. Bu barədə Trend-ə Azərbaycan Maliyyə Nazirliyi yanında Sığorta Nəzarəti üzrə Dövlət Xidmətinin şöbə müdiri Tofiq Məmtiyev deyib.
"Dəyişikliklərdən biri sığorta şirkətlərindən auditor rəyi ilə yanaşı aktuari rəyinin alınması tələbinin tətbiqi olacaq. Beynəlxalq təcrübədə aktuariyalar qarşısında bizdəkindən daha yüksək tələblər qoyulur. Yeni dəyişikliklər aktuariyalara olan tələblərin təyini, onlara şəhadətnamələrin verilmə təlimatının dəqiqləşdirilməsi və bir sıra digər məsələləri nəzərdə tutur.", Məmtiyev deyib.
Maliyyə Nazirliyi habelə elektron imzadan istifadə etməklə sığorta əqdlərinin bağlanmasına imkan verən hüquqi bazanın yaradılması, istehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta növünü aparmağa icazəsi olan sığortaçıların İcbari Sığorta Bürosunda iştirakının təmin edilməsi üçün Azərbaycan Respublikasının müvafiq qanunvericiliyinə dəyişikliklər edilməsi barədə təkliflərini hazırlayıb Büroya təqdim etməlidir. Büronun təşkil olunması da "İcbari sığortalar haqqında" qanununda nəzərdə tutulub.
Hazırda Azərbaycanda üç belə şirkət var, Atəşgah Həyat, Qala Həyat və Paşa Həyat, bunların istehsalatda icbari sığorta xidmətləri təqdim etməyə icazələri var.
Ölkədə ümumilikdə 27 sığorta və bir yenidən sığorta şirkəti fəaliyyət göstərir.
