Azərbaycan, Bakı, 20 sentyabr /Trend, müxbir A.Axundov/
Azərbaycanın Hesablama Palatası auditor yoxlamalarının sayını artırmağı planlaşdırır. Bu barədə çərşənbə axşamı Trend-ə palatanın sədr müavini Adil Məhərrəmov bildirib.
"Məqsədimiz auditor yoxlamalarının sayını artırmaq, onların əhatəsini və büdcə vəsaitlərinin xərclənməsi effektivliyi üzrə yoxlamaların əhatəsini genişləndirməkdir", - Məhərrəmov deyib.
Onun sözlərinə görə, bu məqsədlə Dünya Bankının büdcə və korporativ sektorlarda hesabatlılıq layihəsi (CAP/SAP) çərçivəsində məsləhətçi kimi cəlb edilmiş alman mütəxəssis Aksel Menniken artıq dünya təcrübəsini tətbiq etməklə qanunvericiliyin təkmilləşdirilməsi üçün təklif hazırlayır.
Layihənin ümumi dəyəri 24 milyon dollardır. Layihə DB-nin 11 milyon dollar, Yaponiyanın PHRD fondunun (üç milyon dollar) qrantı, SECO-nun (iki milyon dollar) və Azərbaycan hökumətinin (səkkiz milyon dollar) vəsaiti hesabına maliyyələşdiriləcək. CAP/SAP layihəsi 2008-ci il martın 27-də DB-nin İcraçı Şurası tərəfindən təsdiqlənib.
Məhərrəmovun sözlərinə görə, indi Hesablama Palatası "Azərenerji" ASC-də (elektrik enerjisinin istehsalı və paylanması) auditor yoxlamaları aparır.
"Bu, cari ildə ilk auditor yoxlamasıdır", - o deyib.
