Azərbaycan, Bakı, 26 sentyabr /Trend, müxbir İ.Xəlilova/
Almaniyanın KfW bankının məsləhətçisi "ERM GmbH" və Azərbaycanın "ASPI Consulting Engineers" alyansı Gəncədə sərt məişət tullantılarının idarə olunması sistemi layihəsinin texniki-iqtisadi əsaslandırmasının (TİƏ) hazırlanmasına başlayıb. Bu barədə Trend-ə bazar ertəsi KfW-nin Bakı nümayəndəliyinin rəhbəri Natiq Abdullayev deyib.
"Məsləhətçi 8-10 ay ərzində layihənin TİƏ-sini hazırlamalıdır. Bu, 400 min avro məbləğindəki qrant vəsaiti hesabına həyata keçirilir", - Abdullayev deyib.
Onun sözlərinə görə, tədqiqatlar məişət tullantılarının yığım, çeşidləmə və utilizasiya sisteminin hazırlanmasından ətraf mühitə təsiri və sosial məsələlərin həllinə qədər bütün prosesi əhatə edəcək.
TİƏ-nın nəticəsinə görə, Gəncədə məişət tullantılarının idarə olunması sisteminin investisiya qiyməti müəyyənləşdiriləcək. Bunun əsasında KfW bu layihənin maliyyələşdirilməsinə dair hökumətlə danışıqlara başlayacaq.
"Almaniya hökuməti artıq bu layihənin həyata keçirilməsi üçün 20 milyon avro ayırmağa razılıq verib. Bu layihə üzrə yerinə yetiriləsi işlərin Kioto protokoluna uyğun olduğu sübut edilərsə, onda kreditin vəsaiti daha məqbul şərtlərlə, 12-15 il müddətinə illik 0,75 faizdən az olmayan sövdələşmə ilə təqdim olunacaq", - Abdullayev deyib.
Bundan əvvəl Gəncə şəhəri "Mənzil-kommunal təsərrüfatı" İB-nin baş mühəndisi İsmayıl Daşdəmirov deyib ki, Gəncədə məişət tullantılarının yenidən işlənməsi üçün zavod tikiləcək, bunun üçün 25 hektarlıq sahə ayrılıb. Zavodun əsas vəzifəsi kənd təsərrüfatını tullantılarının yenidən işlənməsi nəticəsində əldə olunan zəruri məhsullarla təmin etmək olacaq.
Azərbaycanda hazırda Bakının Qaradağ rayonunda məişət tullantılarının yandırılması zavodu tikilir.
