Azərbaycan, Bakı, 5 oktyabr /Trend, müxbir A.Axundov/
İlin sonuna qədər Azərbaycanda turizm sahəsində daha 20 milli standartın qəbul olunması gözlənilir. Bu barədə Trend-ə çərşənbə günü Standartlaşdırma, Metrologiya və Patent üzrə Dövlət Komitəsindən məlumat verilib. Hazırda bu sahədə 7 milli standart mövcuddur.
"Azərbaycanda bu ilin "Turizm ili" elan edilməsi və 2012-ci ildə "Eurovision" müsabiqəsinin Bakıda keçirilməsi ilə əlaqədar turizm sahəsinə daha çox diqqət ayrılıb. Hazırda Mədəniyyət və Turizm Nazirliyi tərəfindən ilin sonuna qədər qəbul olunacaq 20 standartın layihəsi hazırlanır", - Dövlət Komitəsindən bildirilib.
Bu standartlar əsasən restoran, hotel və digər turizm obyektlərində xidmətlərin keyfiyyətini nizamlayacaq.
"Bundan əlavə, hotellərin tikintisi şərtlərini və prosesini tənzimləyən standartların da layihələri var", - Dövlət Komitəsindən deyiblər
Hazırda Dövlət Komitəsinin nəzdində "Standartlaşdırma üzrə turizm və yerləşdirmə vasitələrinin xidmətləri" texniki komitəsi fəaliyyət göstərir.
