Azərbaycan, Bakı, 26 oktyabr /Trend, müxbir A.Axundov/
Azərbaycandan olan miqrantlar Rusiyanın əmək bazarında ən fəallardandırlar. Trend-in məlumatına görə, bu barədə çərşənbə günə Bakıda jurnalistlərə RF-nin Əmək və Məşğulluq üzrə Federal Xidməti rəhbərinin müavini İvan Şklovets deyib.
"Rusiya əmək miqrantları, o cümlədən kifayət qədər fəal gələn və işləyən Azərbaycan vətəndaşları üçün tutumlu bazara malikdir", - Şklovets bildirib.
Onun sözlərinə görə, Azərbaycan Rusiyadakı həm leqal, həm də qeyri-leqal miqrantların ümumi sayında Ukrayna və Özbəkistandan sonra üçüncü yeri tutur.
"RF hər il digər ölkələrdən işçi qüvvələrinin gəlişi üçün kvota yaradır. Azərbaycan da daxil olmaqla, digər ölkələrdən gələn miqrantların işə qəbulu üçün Rusiya işəgötürənləri ildə təxminən 1,8 milyon iş yeri açıqlayır. Azərbaycandan bir neçə yüz min leqal miqrantın olduğu hesablanıb, yəni onlar işlərə əmək müqaviləsi ilə qəbul olunub, sığortaya malikdirlər və s", - Şklovets bildirib.
Onun sözlərinə görə, Rusiyada üç milyondan dörd milyona qədər qeyri-leqal miqrant işləyir.
"Biz bu prosesi leqallaşdırmağa çalışırıq. Bunu qadağanedici tədbirlərlə deyil, RF-nin əmək bazarında leqal işi stimullaşdıran tədbirlərlər vasitəsilə etmək istəyirik. Xeyli sayda lazımi sənədləri tərtib etmək əvəzinə, patentlər adlanan kifayət qədər sadələşdirilmiş sxemlər tətbiq ediləcək, yəni aylıq olaraq patent alınır, nəticədə miqrant leqallaşır və sərbəst şəkildə əmək müqaviləsi bağlaya və işləyə bilir. O, özünün leqal vəziyyətini aylıq rəmzi məbləğ ödəməklə dəstəkləyir", - Şklovets deyib.
Onun sözlərinə görə, dövlət miqyasında da tədbirlər görülür.
"Onlar ixtisaslaşdırılmış işçilərin müəyyən peşələrə dəvətindən başlayaraq, ölkədə miqrantların layiqli yaşaması və perspektivdə pasport alması ilə bağlı tədbirlərə və s. qədər mexanizmlərin qurulmasına kömək edir", - Şklovets əlavə edib.