Azərbaycan, Bakı, 2 noyabr /Trend, müxbir A.Axundov/
Avropa İttifaqı (Aİ) Azərbaycan Hesablama Palatasının fəaliyyətinin təkmilləşdirilməsini dəstəkləməyə hazırdır. Trend-in məlumatına görə, bu barədə çərşənbə günü Aİ-nin Azərbaycandakı səfiri Roland Kobia Palatanın 10 illiyinə həsr olunan tədbirdə deyib.
"Biz Azərbaycanın ölkədə iri maliyyə vəsaitlərinin hərəkətinə nəzarəti gücləndirmək üzrə tədbirlərini dəstəkləyirik. Aİ Azərbaycanın Hesablama Palatasının fəaliyyətini müsbət qiymətləndirir. Bu, dəstəyimizi təklif edə biləcəyimiz sahədir", - Kobia deyib.
Parlamentin İqtisadi siyasət komitəsinin sədri Ziya Səmədzadənin sözlərinə görə, Hesablama Palatasının fəaliyyətini təkmilləşdirməsi ilə ölkə iqtisadiyyatının şəffaflığı artır ki, bu da Azərbaycanın dünya iqtisadiyyatına inteqrasiya etməsində böyük rol oynayır.
"Son 20 ildə Azərbaycanın dövlət büdcəsinin xərcləri 20 dəfədən çox artıb. Çoxları narahatlığını bildirdi ki, büdcə xərclərinin artımı inflyasiya, büdcə kəsirinin artması və s. ilə bağlı ölkədə ayrı-ayrı problemlər yaradacaq. Lakin Maliyyə, İqtisadi İnkişaf və Vergilər nazirliklərinin, Hesablama Palatasının və digər strukturların birgə işi nəticəsində bu narahatlıqlar özünü doğrultmadı", - Səmədzadə deyib.