Azərbaycan, Bakı, 11 noyabr /Trend müxbir N.İsmayılova/
Azərbaycan-Macarıstan iqtisadi əməkdaşlıq üzrə hökumətlərarası komissiyasının üçüncü iclası bir ildən sonra Budapeştdə keçiriləcək. Trend-in məlumatına görə, bu barədə cümə günü jurnalistlərə hökumətlərarası komissiyanın Bakıda keçirilən ikinci iclasında Macarıstanın Milli İqtisadiyyat Nazirliyinin dövlət katibi Roza Nad deyib.
"Ümid edirəm ki, həmin vaxta qədər biz əməkdaşlığın müsbət nəticələri haqqında xəbər verə bilərik ki, bu da sadəcə bizim münasibətlərin intensivləşdirilməsini nəzərdə tutmur. Bu, əsl dönüş nöqtəsi olacaq", - Nad bildirib.
Onun sözlərinə görə, Macarıstan nümayəndə heyətinin Azərbaycana hazırkı səfəri iqtisadiyyat, ticarət, təhsil, mədəniyyət və digər sahələrdə iki ölkə arasında münasibətləri inkişaf etdirməyə imkan verəcək.
"Biz əməkdaşlıq etməyi planlaşdırdığımız kənd təsərrüfatı, sənaye, təhsil, energetika, İKT və elm daxil olmaqla qtisadiyyatın bütün sferalarını nəzərdən keçirdik. Bu sferalarda əməkdaşlığı genişləndirmək üçün işçi qrupları yaradılır", - dövlət katibi deyib.
Nad hesab edir ki, qarşılıqlı mal dövriyyəsi kifayət qədər aşağı səviyyədədir və 80 milyon dollara çatmır. Bu məbləğin təxminən 99 faizi Macarıstanın ixracatının payına düşür.
"Biz istəyirik ki, bu vəziyyət dəyişsin və təkcə mal dövriyyəsinin artımı ilə məhdudlaşmasın, qarşılıqlı investisiyaların həcmi də artsın", - dövlət katibi bildirib.
