Azərbaycan, Bakı, 23 noyabr /Trend, müxbir A.Axundov/
Azərbaycan Mərkəzi Bankı (AMB) 2012-ci ilin dövlət büdcəsində nəzərdə tutulan büdcə xərclərinin səviyyəsini optimal hesab edir. Trend-in məlumatına görə, bu barədə çərşənbə günü AMB-nin İdarə Heyətinin sədri Elman Rüstəmov 2012-ci il və sonrakı üç il üçün dövlət büdcəsi layihəsinin parlamentdə müzakirəsi zamanı bildirib.
Gələn il üçün dövlət büdcəsinin gəlir hissəsi 16 436,4 milyon manat, xərclər hissəsi isə 16 984,4 milyon manat məbləğində proqnozlaşdırılır. 2011-ci ilin proqnozları ilə müqayisədə büdcə gəlirlərinin artımı 5,67 faiz, xərclər isə 6,5 faiz səviyyəsində gözlənilir.
"2012-ci ilin büdcəsi yetərincə yüksək səviyyədə hazırlanıb. Onun xərclərinin artımı konservativdir, çünki davamlılıq problemi mövcuddur. Bu gün birləşdirilmiş büdcənin həcmi 25 milyard dollar təşkil edir, büdcə xərcləri artıq ÜDM-in 37 faizinə çatıb. Bu "Böyük səkkizlik" (G8) ölkələrinin səviyyəsidir. Alimlər təsdiqləyirlər ki, bu göstəricini ötüb keçmək təhlükəlidir. Belə ki, ÜDM-in böyük hissəsini dövlət öz əlində cəmləyib böldükcə, bu, biznesin inkişafına bir o qədər təsir edir. Biz bu səviyyəni optimal hesab edirik", - Rüstəmov deyib.
Onun sözlərinə görə, dövlət büdcəsində neftin bir barelinin qiymətinin 80 dollar səviyyəsi də konservativ və reallıqdır.
"Bizdə bu, 80 dollar səviyyəsində nəzərdə tutulub. Hərçənd ki, BVF gələn il üçün neftin bir barelinin orta qiymətini 102 dollar səviyyəsində proqnozlaşdırır", - o bildirib.
Rüstəmovun sözlərinə görə, 2012-ci ildə heç bir infrastruktur layihə dayandırılmayacaq və ya məhdudlaşdırılmayacaq.
"Dünya bazarlarında gedən hazırkı proseslərlə bağlı bir çox dövlətlər hətta sosial layihələri də ixtisara salırlar. Bizdə isə əksinə, sosial və infrastruktur layihələr davam və inkişaf etdirilir", - Rüstəmov deyib.
O bildirib ki, büdcə kəsirinin 548 milyon manat səviyyəsində proqnozlaşdırılması da (gələn il üzrə proqnozlaşdırılan ÜDM-in 1,3 faizi) simvolik və texniki xarakter daşıyır.
Noyabrın 23-nə olan rəsmi məzənnə 0,7865 AZN/USD təşkil edib.
