Azərbaycan, Bakı, 30 noyabr /Trend, müxbir A.Axundov/
"Azərbaycan Sənaye Sığorta" şirkəti Azərbaycan Mərkəzi Bankının (AMB) əməkdaşlarının tibbi sığortası üzrə tenderin qalibi olub. Trend-in məlumatına görə, bu barədə Tender Komissiyasının çərşənbə günü rəsmi mətbuatda dərc etdiyi məlumatda deyilir.
"Şirkət ilə artıq 12 ay müddətinə müvafiq müqavilə imzalanıb", - məlumatda qeyd edilir.
Tenderin şərtlərinə görə, şirkət xidmətlərin göstərilməsinə 2011-ci il noyabrın 21-dən başlayıb.
Bir müddət əvvəl AMB-nin balansında olan əsas vəsaitlərin və nağd pulların sığortalanması üzrə "Azərbaycan Sənaye Sığorta", nəqliyyat vasitələrinin sığortalanması üzrə isə "Paşa Sığorta" tenderin qalibi olub.