Azərbaycan, Bakı, 9 dekabr /Trend, müxbir N.İsmayılova/
Asiya İnkişaf Bankı (AİB) Bakının şəhər nəqliyyatının inkişafını maliyyələşdirmək məqsədilə Azərbaycan hökuməti ilə danışıqlara yalnız 2013-cü ildə başlayacaq. Bu barədə cümə günü Trend-ə AİB-in ölkəmizdəki nümayəndəliyinin rəhbəri Olli Noroyono deyib.
"Hələlik bizim bu istiqamətdə konkret təkliflərimiz yoxdur. Lakin biz danışıqlara açığıq və öz marağımızı artıq göstərmişik. Əməliyyatlar üzrə bankın əvvəl təsdiq edilmiş biznes planına əsasən, bu istiqamətdə danışıqlar 2013-cü ildə başlayacaq", - o qeyd edib.
Əvvəl verilən məlumta görə, Bakının şəhər nəqliyyatının inkişafı üçün investisiya proqramı hazırlanır. Proqramın maliyyələşdirilməsinə AİB 300 milyon dollar ayırmağa hazırdır.
İlin əvvəlində tərkibində paytaxtın şəhər nəqliyyatının inkişafının maliyyələşdirilməsi üzrə mütəxəssislər Arnaud Daufin və Bertrand Qoalunun olduğu AİB Şəhər inkişafı və su təsərrüfatı departamentinin ilk məsləhət missiyası Bakıda olub. Bu səfər zamanı Nəqliyyat Nazirliyi, "Azərbaycan Dəmir Yolları" QSC və Bakı Metropolitenində görüşlər keçirilib.
