Azərbaycan, Bakı, 2 yanvar /Trend müxbir A.Axundov/
Noyabrda Bakının qeyri-yaşayış obyektləri bazarında kommersiya məqsədləri üçün istifadə edilən əmlak və mənzil kirayəsinin qiyməti müfaviq olaraq, 0,2 faiz və 0,3 faiz azalıb. Bu barədə bazar ertəsi Trend-ə "Əmlak Bazarı İştirakçıları" İctimai Birliyindən məlumat verilib.
Məlumata görə, noyabrda kommersiya obyektlərinin alqı-satqısı üzrə sövdələşmələrin sayı 5,7 faiz azalıb. Noyabrda təklif 1,8 faiz aşağı düşüb.
Noyabrda Bakıda qeyri-yaşayış obyektinin bir kvadratmetrinin orta hesabla qiyməti 2860 dollar təşkil edib. Əvvəlki ay bu göstərici 2860 dollar olub. Aparılan araşdırmalara əsasən, qiymətlər 2010-cu ilin analoji dövrünə nisbətən 1,4 faiz, əvvəlki rüblə müqayisədə isə 0,6 faiz azalıb.
Bazarda orta qiymətdən (1 kvadratmetrə görə 2860 dollar) aşağı təklif edilən qeyri-yaşayış obyektlərinin payı qeyri-yaşayış sahələri bazarının ümumi portfelində 53,2 faiz təşkil edib.
Qeyri-yaşayış obyektlərində qiymət artımı (0,4 faiz) ancaq Bakının Qaradağ rayonunda müşahidə edilib. Ən çox azalma isə (1 faiz) Bakının Xəzər rayonunda qeydə alınıb.
Əvvəlki ayda olduğu kimi 2011-ci ilin noyabrında da qeyri-yaşayış sahələri əsasən fərdi tikililərdən və yeni tikilililərin birinci və ikinci mərtəbələrindəki otaqlardan, eləcə də təkrar mənzilin təyinatı dəyişilən birinci mərtəbələrinin otaqlarından ibarət olub.
"Bazarda qiymət azalması və mövcud seqment üzrə dinamikanın nisbi azalması, təklifin aşağı həcmi ekspozisiya müddətinin 1,6 faiz artmasına gətirib çıxarıb" , - təşkilatın ekspertləri hesab edirlər.
Noyabrda Bakı üzrə qiymət indeksi ötən ilin müvafiq dövrü ilə müqayisədə 1,2 faiz, əvvəlki rübə nisbətən isə 0,6 faiz azalıb. Oktyabrla müqayisədə kommersiya obyektlərində qiymət indeksi 0,2 faiz və ya 0,6 bənd azalaraq 282,3 bəndə enib.
