Azərbaycan, Bakı, 9 aprel /Trend, müxbir Ə.Həsənov/
Fevral ayında Bakıda 1 sot torpağın orta qiyməti 2,6 faiz artaraq 13 806 dollardan 14 234 dollara çatıb. Trend-in məlumatına görə, bu barədə bazar ertəsi "Əmlak Bazarı İştirakçıları" İctimai Birliyinin paytaxtın torpaq bazarında apardığı monitorinqlərin nəticələri üzrə məlumatında deyilir.
"Qiymət artımının əsas səbəbi paytaxtda mənzil söküntüsünün aparılması nəticəsində fərdi yaşayış evlərinə və sənədli torpaq sahələrinə tələbatın artması olub", - məlumatda deyilir.
Fevralda Bakının əksər rayonlarında qiymət artımı qeydə alınıb. Ən çox qiymət artımı Qaradağ rayonunda (4,6 faiz) müşahidə edilib. Bununla yanaşı, torpaq bazarında nisbətən aktiv rayonlar Binəqədi və Qaradağ rayonları olub. Ən passivi isə Nəsimi rayonu olub.
Fevral ayında torpaq bazarına təklif olunan ən bahalı torpaq sahəsi (1 sota görə 350 min dollar) Nəsimi (Çay fabrikinin yaxınlığı) rayonunda, ən ucuz torpaq sahəsi isə (1 sota görə 350 dollar) Abşeron (Pirəküşkül qəsəbəsi) rayonunda qeydə alınıb.
Fevralda bazara təklif olunan ümumi 769,5 hektar torpaq sahəsinin 79,3 faizini boş sahə, qalanını isə qeyri-yaşayış və köhnə yaşayış sahələri təşkil edib. Torpaq bazarında təklifə çıxarılan torpaq sahələrinin sayının çox olmasına baxmayaraq, şəhərin mərkəzində və mərkəzə yaxın ərazilərdə söküntüyə məruz qalan mənzil və fərdi yaşayış evlərinin hesabına tələbat 2,6 faiz artıb.
Bazarda torpağın ekspozisiya müddəti əvvəlki ayla müqayisədə 2,6 faiz azalıb. Buna baxmayaraq, əmlakın bu növü üzrə risk dərəcələrinin azalması davam edir. Ay ərzində bağlanan alqı-satqı əqdlərinin sayında artım müşahidə edilib və bu seqment üzrə aktivlik müsbət tərəfə dəyişib.
Bazarın araşdırılması göstərir ki, şəhərin mərkəzində torpaq sahələri məhduddur və bunun nəticəsində mərkəzdən kənar ərazilərdə yerləşən sahələrin qiyməti artır.
Son dövrlər müşahidə edilən mərkəzdə fərdi evlərin söküntüsünün aparılması və sənədli torpaq sahələrinə tələbatın artması qiymət artımına səbəb olacaq.
"Torpaq sahələrinin ipoteka prosesində girov predmeti kimi qəbul olunmaması mülkiyyətin bu növünə olan marağın hələ də aşağı olması ilə nəticələnir, - təşkilatın ekspertləri hesab edirlər. - Bu arada son aylar torpaq bazarında baş verən proseslər bazarın bu seqmenti ilə aparılan əməliyyatlarda risklərin azalmasına imkan yaradıb".
