Azərbaycan, Bakı, 25 aprel /Trend, müxbir A.Axundov/
Asiya İnkişaf Bankı (AİB) Azərbaycanın nəqliyyat sektoru üçün əlavə maliyyələşdirmə təqdim etməyə hazırdır. Bu barədə çərşənbə günü Trend-ə bankın ölkədəki nümayəndəliyinin rəhbəri Olli Noroyono bildirib.
"Biz hazırda əlavə maliyyələşdirməyə ehtiyacın olub-olmaması ilə bağlı hökumətlə danışıqlar mərhələsindəyik. Lakin ümumilikdə Azərbaycanın nəqliyyat sektoru üçün maliyyələşdirmə təqdim etməyə hazırıq", - Noroyono deyib.
Bu məqsədlə bankın şəhər nəqliyyatı üzrə mütəxəssisi hökumətlə bu məsələləri müzakirə etmək üçün çərşənbə axşamı ikigünlük səfərlə Bakıya gəlib.
Xəbər verildiyi kimi, Bakının şəhər nəqliyyatının inkişafı üçün investisiya proqramı hazırlanır. AİB həmin proqramın maliyyələşdirilməsinə 300 milyon dollar ayıracaq.
