Azərbaycan, Bakı, 31 may /Trend, müxbir E.İsmayılov/
Dağıstan ərazisində dəmir yolunda baş vermiş partlayış Azərbaycanla Rusiya arasında dəmir yolunda hərəkətə mane olmayıb. Bu barədə cümə axşamı Trend-ə "Azərbaycan Dəmir Yolları" QSC-nin mətbuat xidmətinin rəhbəri Nadir Əzməmmədov bildirib.
Rusiya KİV-inin məlumatına görə, cümə axşamı səhər Dağıstanda naməlum şəxslər yük qatarını partladıblar. Zərərçəkən yoxdur. Moskva vaxtı ilə saat 07:55-də dəmir yolunun İnçxe-İzberbaş mənzilində yük qatarının 30-cu vaqonu altında partlayıcı qurğu işə düşüb, qatar relsdən çıxmayıb.
Əzməmmədovun sözlərinə görə, bu gecə Tümen-Bakı reysi Bakıya daxil olub, yerli vaxtla səhər saat 06:00-da paytaxtdan çıxıb.
"Bu günə başqa reyslər planlaşdırılmayıb, Dağıstan ərazisində baş verənlər isə dəmir yol nəqliyyatına təsir etməyib", - o deyib.