...

Avqustda Azərbaycanda ilk kredit bürosunun səhmdarları məlum olacaq

Biznes və iqtisadiyyat xəbərləri Materials 6 İyul 2012 15:33 (UTC +04:00)

Azərbaycan, Bakı, 6 iyul / Trend, müxbir Ə.Həsənov/

Azərbaycanda ilk kredit bürosunun səhmdarları olmaq istəyən banklar iyulun 31-dək Beynəlxalq Maliyyə Korporasiyasına (IFC) qarşılıqlı anlaşma memorandumunun imzalanması haqqında xəbərdarlıq göndərməlidirlər. Bu barədə cümə günü Trend-ə IFC-nin Mərkəzi Asiya və Azərbaycanda maliyyə infrastrukturlarının möhkəmləndirilməsi layihəsinin ölkə üzrə əlaqələndiricisi Teymur Heybətov bildirib.

"Biz anlayırıq ki, belə memorandumun imzalanması üçün Müşahidə Şurasının və ya Səhmdarlar Yığıncağının razılığını almaq lazımdır. Ona görə də biz bütün bunları nəzərə alaraq ayın sonunadək banklara bizə xəbərdarlıq göndərmələrini təklif etmişik", - Heybətov deyib.

Onun sözlərinə görə, xəbərdarlıq aldıqdan sonra IFC müvafiq müqavilə hazırlayacaq və onları imzalamaq üçün kredit bürosunun səhmdarı olmaq istəyən banklara göndərəcək.

Texniki tərəfdaşın cəlb olunması məsələsinə toxunan Heybətov qeyd edib ki, əvvəlcə banklarla bir sıra məsələləri müzakirə etmək lazımdır, daha sonra isə IFC texniki tərəfdaşlar üçün sonradan səhmdar banklara göndəriləcək sorğu (texniki tələblərin olduğu sənəd) hazırlayacaq.

İyulun 5-də Kredit Bürosunun potensial səhmdarları üçün "dəyirmi masa" keçirilib. Burada əsas məsələ qarşılıqlı anlaşma memorandumunun imzalanması olub. Tədbirdə Kredit Bürosunun yaradılmasını çox müsbət qiymətləndirən 10 bank iştirak edib.

2005-ci ildən Azərbaycan Mərkəzi Bankı yanında Mərkəzləşdirilmiş Kredit Reyestri fəaliyyət göstərir.

Xəbər lenti

Xəbər lenti