Azərbaycan, Bakı, 7 sentyabr /Trend/
Azərbaycan dünya iqtisadiyyatında rəqabətədavamlılıq reytinqində mövqeyini xeyli yaxşılaşdırıb. Bu barədə cümə günü Trend-ə Azərbaycan İqtisadi İnkişaf Nazirliyinin İqtisadi siyasət, analiz və proqnozlaşdırma şöbəsinni rəhbəri Ədalət Muradov bildirib.
Ümumdünya İqtisadi Forumunun (ÜİF) tərtib etdiyi 2012-2013-cü illərdə rəqabətədavamlılıq reytinqində Azərbaycan dünyanın nisbətən rəqabərətədavamlı iqtisadiyyatları sırasına daxil olub və 144 ölkə arasında 46-cı yeri tutub.
"Ötənilki hesabatla müqayisədə Azərbaycan öz mövqeyini 9 bənd yaxşılaşdırıb ki, bu da dövlət başçımızın uğurla yürütdüyü iqtisadi siyasətin göstəricilərindən biridir", - Muradov deyib.
Ötən illə müqayisədə Azərbaycan ən böyük artımı əmtəə bazarının effektivliyinin göstəricisi üzrə əldə edib - 19-cu mövqe.
"İnnovasiya potensialı göstəricisi üzrə Azərbaycan reytinqdə 14 pillə, texnoloji səviyyə üzrə 13 pillə, institutların keyfiyyəti üzrə 5 pillə artıb. Makroiqtisadi stabillik göstəricisi üzrə Azərbaycan ilk iyirmilikdə (18-ci yerdə) qərarlaşıb ki, bu da çox yaxşı göstəricidir", - Muradov qeyd edib.
Azərbaycan rəqabətədavamlılıq indeksi üzrə artıq dördüncü ildir ki, MDB məkanında lider olur. Ondan sonra Qazaxıstan, Rusiya, Ukrayna və başqaları gəlir.
"2005-ci ildən başlayaraq Azərbaycandan başqa MDB ölkələri arasında öz mövqelərini yalnız Ukrayna, Qazaxıstan, Rusiya və Tacikistan yaxşılaşdırıb. Belə ki, Azərbaycan 23, Ukrayna 11, Qazaxıstan 10, Rusiya 8, Tacikistan 4 pillə irəliləyib. Başqa sözlə, Azərbaycan öz reytinqinin yaxşılaşdırılması tempi üzrə də liderlik edir", - Muradov deyib.
ÜİF hər bir ölkə üçün rəqabətədavamlılıq indeksini hesablayarkən 12 əsas göstəricidən istifadə edir: institutların keyfiyyəti, infrastruktur, makroiqtisadi stabillik, sağlamlıq və ibtidai təhsil, ali təhsil və peşə hazırlığı, əmtəə bazarının effektivliyi, maliyyə bazarının inkişafı, texnoloji səviyyə, daxili bazarın həcmi, şirkətlərin rəqabətqabiliyyətliliyi, innovasiya potensialı.