Azərbaycan, Bakı, 13 noyabr /Trend, müxbir A.Axundov/
Azərbaycanda tikinti materiallarının istehsalında 2013-cü ildə 30,1%, növbəti 3 ildə isə orta hesabla 36.9% artım proqnozlaşdırılır. Trend-in məlumatına görə, bu barədə çərşənbə axşamı iqtisadi inkişaf naziri Şahin Mustafayev Milli Məclisdə 2013-cü il və növbəti 3 il üçün dövlət büdcəsi haqqında qanun layihəsinin müzakirəsi zamanı deyib.
"Bu artım, əsasən, yeni sement, metal konstruksiyalar, habelə tikinti materialları istehsal edən digər müəssisələrin, o cümlədən Hacıqabul rayonunda seramik plitələr istehsalı zavodunun fəaliyyətə başlaması ilə bağlı olacaq", - Mustafayev bildirib.
2013-2016-cı illər ərzində maşınqayırma sənayesinin orta hesabla 7,3%, ölkədə gəmiqayırma zavodunun fəaliyyətə başlaması hesabına nəqliyyat vasitələrinin istehsalının isə orta hesabla 30,9% artacağı proqnozlaşdırılır.
Nazirin sözlərinə görə, ölkədə yeni yaradılacaq, eləcə də fəaliyyət göstərən müəssisələrdə istehsal həcmlərinin artırılması hesabına qida məhsullarının istehsalında 2013-cü ildə 4,4%, növbəti 3 ildə orta illik 4,9% artım proqnozlaşdırılır.
Qeyri-neft sektorunun aparıcı sahələrindən olan kənd, meşə və balıqçılıq təsərrüfatı üzrə 2013-cü ildə 5,1%, növbəti 3 ildə orta hesabla 5,3% artım proqnozlaşdırılır.
