Azərbaycan, Bakı, 7 yanvar /Trend, müxbir A.Axundov/
Həyat sığortası üzrə fəaliyyət göstərən "Qala Həyat" şirkəti 2013-cü ildə 7 milyon manat səviyyəsində mükafat yığmağı planlaşdırır. Bu barədə bazar ertəsi Trend-ə şirkətin İdarə Heyətinin sədri Əsgər Ələkbərov deyib.
"2012-ci ildə mükafatlar əvvəlki ilin göstəricilərini 20-30 faiz və bizim proqnozlarımızı üstələyib. Ödənişlər də yığımları üstələyib ki, bu da bizim müştəri bazamızın genişlənməsi ilə əlaqədardır. Biz 2013-cü ildə 7 milyon manat səviyyəsində yığım gözləyirik", - Ələkbərov qeyd edib.
Onun sözlərinə görə, şirkət üçün könüllü yığım sığortası üzrə yığımın böyük artımı diqqətəlayiq amildir.
"Bu, ondan xəbər verir ki, bazarda bu yeni məhsula artan maraq var. 2013-cü ildə yeni məhsullar hazırlamağı planlaşdırırıq. Biz artıq onlar üzərində işləyirik. Bu, əlbəttə ki, həyat sığortasının könüllü növləridir. 2013-cü ilin birinci rübündə və ya birinci yarımillikdə yeni məhsulları buraxmağı planlaşdırırıq. Şirkətimizin portfelinin böyük hissəsi icbari sığortanın payına düşür", - İH sədri bildirib.
Onun sözlərinə görə, 2013-cü ildə şirkətin nizamnamə kapitalının artması istisna edilmir. Hazırda şirkətin nizamnamə kapitalı 5,5 milyon manat səviyyəsindədir.