Azərbaycan, Bakı, 3 dekabr /Trend, müxbir A.Axundov/
Dünya Bankının (DB) Azərbaycandakı əməliyyatlar üzrə yeni strategiyasını müzakirə etmək üçün yanvar ayında bankın Cənubi Qafqaz üzrə regional direktoru Henri Kerali Bakıya gələcək.
Bu barədə Trend-ə bankın Bakıdakı nümayəndəliyinin rəhbəri Larisa Leşenko bildirib:
"Biz yanvarda məsləhətləşmələrə başlamaq istəyirik və hökumətlə, ictimaiyyətlə və özəl sektorla müzakirələr aparacağıq. Dialoq həm paytaxtda, həm də regionlarda keçiriləcək. Biz sənəddə hansı yeni strateji istiqamətlərin əks olunacağını bilmək istəyirik. Növbəti təqvim ili yeni strategiyanın hazırlanmasına həsr olunacaq. Biz yanvarda işə başlayacağıq və gələn ilin noyabr-dekabr aylarında strategiyanın hazırlanmasını başa çatdıracağıq".
Yeni strategiya həm hazırkı fəaliyyət istiqamətlərini, həm də yeni sahələri əhatə edəcək.
Alternativ enerji mənbələrinin inkişafı, texniki peşə təhsili və ali təhsildə islahatların aparılması, həmçinin səhiyyənin maliyyələşdirilməsi sistemləri yeni istiqamətlər ola bilər.
