Azərbaycan, Bakı, 4 dekabr /Trend, müxbir E.Əliyev/
Azərbaycan İraqda həyata keçirilən infrastruktur layihələrində iştirak etməyə maraq göstərir. Trend-in məlumatına görə, bunu iqtisadiyyat və sənaye nazirinin müavini Niyazi Səfərov Bakıda keçirilən ticarət, iqtisadiyyat sahəsində ikitərəfli əməkdaşlıq üzrə hökumətlərarası komissiyanın iclasında deyib.
Onun sözlərinə görə, Azərbaycan İraqa ixracatın inkişaf etdirilməsinin lehinə çıxış edir: "Hazırda ölkələrimiz arasında əməkdaşlıq yaxşı səviyyədədir və inkişaf potensialı mövcuddur. Azərbaycan İraqda keçirilən iri tenderlər haqqında məlumatın əldə edilməsində maraqlıdır".
N.Səfərov qeyd edib ki, ikitərəfli əməkdaşlığın normativ-hüquqi bazasının inkişafı üzərində işləmək lazımdır: "Azərbaycan da müvafiq maraq olacağı təqdirdə İraq tərəfinə müəyyən investisiya layihələri təqdim etməyə hazırdır".