Azərbaycan, Bakı, 10 yanvar /Trend, müxbir R.Hafizoğlu/
Türkiyədə üzən xəstəxananın tikintisi üzrə tender elan ediləcək. Trend-in cümə günü "Sabah" qəzetinə istinadən verdiyi məlumata görə, bunu Türkiyənin səhiyyə naziri Mehmet Müəzzinoğlu deyib.
Onun sözlərinə görə, Türkiyə ərazisi seysmik cəhətdən aktiv olduğuna görə, belə xəstəxana gəmisinin yaradılmasına ehtiyac var.
M.Müəzzinoğlu deyib ki, üzən xəstəxana sutkalıq rejimdə işləyəcək: "Üzən xəstəxanada 206 palata, 10 mini-poliklinika, 8 əməliyyat otağı olacaq. Bundan başqa, iki vertolyot meydançasının olması da gözlənilir".
Nazir əlavə edib ki, üzən xəstəxananın korpusunun uzunluğu 200 metr təşkil edəcək: "Bir üzən xəstəxananın yaradılması layihəsinin dəyəri 100 milyon dollar olacaq. Üzən xəstəxananın tikintisi üzrə tenderin 2014-cü ilin II rübündə elan ediləcəyi gözlənilir".