Azərbaycan, Bakı, 10 aprel /Trend, müxbir E.Əliyev/
Azərbaycanın "Qala Həyat Sığorta" ASC sığorta şirkətinin aktivləri 2013-cü ilin yekunları üzrə 57,86 faiz artaraq ilin əvvəlindəki 11,13 milyon manata nisbətdə 17,57 milyon manat təşkil edib. Trend-in məlumatına görə, bu barədə şirkətin cümə axşamı rəsmi mətbuatda dərc olunmuş balans hesabatında deyilir.
Sığorta şirkətinin maliyyə hesabatlılığının auditini "CACS Audit" MMC aparıb.
2013-cü ilin sonunda şirkətin uzunmüddətli aktivləri 1,91 milyon manat, qısamüddətli aktivləri isə 15,66 milyon manat təşkil edib.
Ötən il pul vəsaitlərində və onların ekvivalentlərində 13,65 milyon manat yığılıb. Bu həcmdən 0,78 milyon manat hesablaşma hesabında, 12,85 milyon manat isə depozit hesablarında yığılıb.
2013-cü ilin yekunları üzrə "Qala Həyat Sığorta" ASC-in ödənilmiş nizamnamə kapitalı dəyişməyərək 5,005 milyon manat səviyyəsində qalıb. Ötən ilin sonunda şirkətin məcmu kapitalı 2012-cu illə müqayisədə 31,62 faiz artaraq 7,66 milyon manat təşkil edib.
Şirkətin məcmu öhdəlikləri 87 faiz artaraq 9,92 milyon manat təşkil edib.
Ötən ilin yekunları üzrə şirkətin gəlirləri 6,78 milyon manat, xərcləri isə 4,3 milyon manat olub. Şirkət 2013-cü ili 2,002 milyon manatlıq mənfəətlə başa vurub.