Azərbaycan, Bakı, 1 may /Trend, müxbir E.Əliyev/
Dünya Bankı (DB) Azərbaycanda fəaliyyət strategiyası layihəsini 2015-ci ilin I rübünə hazırlayacaq. Bunu cümə axşamı Trend-ə DB-nin Bakı ofisinin rəhbəri Larisa Leşenko deyib.
Onun sözlərinə görə, strategiya bankın tətbiq etdiyi yeni qaydalar nəzərə alınmaqla hazırlanacaq. Sənəd "Ölkə ilə tərəfdaşlıq çərçivələri" adlanacaq. DB onun hazırlanmasından öncə ölkə üzrə sistematik diaqnostika - yeni məhsul hazırlayır. Bu diaqnostika ölkə qarşısında dayanan çağırışların əsas problemini müəyyənləşdirmək məqsədilə aparılır.
L.Leşenkonun sözlərinə görə, qeyd edilən iş bankın müəyyənləşdirdiyi bəzi məqsədlərə çatmaq üçün aparılır.
O qeyd edib ki, bunun birincisi dərin yoxsulluq, ikincisi isə zənginliyin bərabər bölüşdürülməsi məsələsidir: "İkinci istiqamət üzrə tərəqqinin müəyyənləşdirilməsi üçün yeni göstərici tətbiq ediləcək: gəlirlərin səviyyəsi üzrə əhalinin bölüşdürülməsi aparılır və bu bölüşdürmənin aşağı həddi (40 faiz) təhlil edilir. Bank sonra əhalinin bu kateqoriyasının gəlirlərinin artımını ölçəcək və bu artımın ölkə üzrə ümumilikdə əhalinin gəlirlərinin orta artım dinamikasından aşağı olmamasına nəzarət edəcək. Bu göstərici olduqca vacibdir. Çünki tədqiq edilən əhali kateqoriyası təkcə aztəminatlı vətəndaşları deyil, həmçinin müxtəlif risklərə həssas olan orta gəlirli şəxsləri və orta sinfin aşağı səviyyəsini əhatə edir".
Onun sözlərinə görə, bu təhlil yuxarıda qeyd edilən göstəricilər üzrə ölkənin tərəqqisini izləməyə və sonra işlənməli olan istiqamətlərin müəyyənləşdirilməsinə kömək edəcək: "Bu diaqnostika başa çatdıqdan sonra strategiya layihəsinin hazırlanması başlayacaq. Azərbaycan Avropa və Mərkəzi Asiya regionunda strategiyanın yeni formatda pilot rejimində başlanıldığı üç ölkədən (Albaniya, Bolqarıstan) biri oldu".
L.Leşenko bildirib ki, cari ilin iyununda diaqnostikanın ilkin nəticələri əldə edilən zaman dövlət strukrturlarının, ictimai təşkilatların və akademik dairələrin cəlb edilməsi ilə konsultasiyaların keçirilməsinə başlanılacaq: "Hesablamalarımıza görə, hesabatın layihəsi sentyabrda hazırlanacaq. Bundan sonra Azərbaycanda DB-nin strategiyasına hazırlıq başlayacaq. Konsepsiyanın noyabrda, yekun sənədin isə gələn ilin I rübündə hazır olacağı gözlənilir. Bu sənəd aparılmış bütün araşdırmaları, cari strategiyanın icrasının nəticələrini əks etdirəcək".
Onun sözlərinə görə, strategiya layihəsi yenə də 4 il müddətinə hesablanıb: "Eyni zamanda, sənədin hazırlandığı il də orada əks olunacaq. Bununla da, strategiya 2015-2018-ci fiskal illərini əhatə edəcək".