Azərbaycan, Bakı, 8 may /Trend, müxbir E.Əliyev/
Dünya Bankı (DB) Azərbaycanda təhsilin inkişafı üzrə layihənin hazırlanmasına başlayıb. Bunu cümə axşamı Trend-ə DB-nin Bakı ofisinin rəhbəri Larisa Leşenko deyib.
L.Leşenko qeyd edib: "Biz layihənin 2015-ci ilin ikinci yarısında hazır olacağını gözləyirik və həmin vaxt onu təqdim etmək olar. Layihə orta təhsilin mərhələrinin bütün istiqamətlərini əhatə edəcək. Söhbət ali, orta ixtisas və peşə təhsilindən, müxtəlif treninq və digər tədbirlərdən gedir".
Onun sözlərinə görə, layihənin dəyərindən danışmaq hələ tezdir: "Biz lazım olacaq məbləğin həcminin şərti qiymətləndirilməsini keçirəcəyik, lakin konkret məbləğ haqqında layihə hazır olduqdan sonra danışmaq mümkün olacaq".
L.Leşenko bildirib ki, layihənin istiqamətlərindən biri təhsilin keyfiyyətinin yüksəldilməsi, onun Avropa standartlarına çatdırılmasıdır: "Bundan başqa, layihə bu sahədə idarəetmənin inkişafı, kadr hazırlığı, bəzi institusional dəyişiklikləri və infrastruktura investisiya yatırmaq məsələlərini əhatə edəcək".
Onun sözlərinə görə, bəzi ali məktəblərdə və digər təhsil müəssisələrində pilot layihələr reallaşdırılacaq: "Bu layihələr zamanı bu və ya digər yeniliklər işlənəcək. Bu, təhsil müəssisələrinin muxtariyyətini artırmağa yönəldilmiş hər hansı islahatlar ola bilər və bu, kifayət qədər perspektivli istiqamətdir. Bununla bağlı yekun qərar hələ yoxdur".