Azərbaycan, Bakı, 6 iyun /Trend, müxbir E.Əliyev/
Asiya İnkişaf Bankı (AİB) indiyədək Azərbaycan hökumətindən ölkənin dəmiryollarının inkişafı üçün texniki dəstək göstərilməsi ilə bağlı cavab gözləyir. Bu barədə cümə günü Trend-ə bankın Bakıdakı nümayəndəliyindən bildirilib.
Bankdan deyiblər ki, dəmiryol investisiya proqramı üzrə təklif ikinci dəfə ötən ilin noyabrında təqdim edilsə də, indiyədək müvafiq strukturlardan heç bir sorğu daxil olmayıb.
Bank proqramın hazırlanmasına bir milyon dollar məbləğində qrant ayırmağa hazırdır.
AİB analoji təkliflə 2010-cu ildə çıxış edib. Lakin Azərbaycan tərəfi o zaman bankın vəsaitlərinin cəlb edilməsindən imtina edib. Eyni zamanda, ölkənin dəmiryollarının inkişafı sahəsində əməkdaşlıq AİB-in fəaliyyətində prioritet olaraq qalır ki, bu da öz əksini bankın Azərbaycandakı fəaliyyət strategiyasında tapıb.
Azərbaycan 1999-cu ildən AİB-in üzvüdür. Bankın ölkə üzrə aktiv kredit portfeli 1,2 milyard dollara çatır.