Azərbaycan, Bakı, 6 iyun /Trend, müxbir Z.Qurbanova/
2014-cü ilin aprel ayının yekunları üzrə Azərbaycan regionlarında əhaliyə verilən kreditlər bankların kredit portfelinin ümumi həcmində 2 491,6 milyon manat, yaxud 15,3 faiz təşkil edib ki, bu da ötən ilin analoji dövrünün göstəricisini 1,92 dəfə (1293,47 milyon manat) üstələyir.
Trend-in məlumatına görə, bu barədə Azərbaycan Mərkəzi Bankının (AMB) statistik hesabatında deyilir.
Hesabata əsasən, apreldə Bakıda bu göstərici 13 753,7 milyon manat təşkil edib ki, burada kreditlərin milli valyutada payı 9 819,4 milyon manat olub. Bu ilin aprelində ölkədə kreditlər üzrə orta faiz dərəcəsi 14,3 faiz, Bakı üzrə isə 13,2 faiz təşkil edib.
Mərkəzi Bankın məlumatına görə, Abşeron iqtisadi rayonu üzrə kreditləşmənin həcmi 17,4 orta faiz dərəcəsi ilə 502,9 milyon manat, Aran iqtisadi rayonu - 20,3 orta faiz dərəcəsi ilə 871,2 milyon manat, Dağlıq Şirvan - 97,8 milyon manat (23,3 faiz), Gəncə-Qazax - 332,9 milyon manat (21,5 faiz), Quba-Xaçmaz - 100,5 milyon manat (21,1 faiz), Lənkəran - 266,1 milyon manat (23,3 faiz), Şəki-Zaqatala - 139,5 milyon manat (20,1 faiz), Yuxarı Qarabağ - 59,6 milyon manat (18,8 faiz), Kəlbəcər-Laçın - 22,5 milyon manat (24,3 faiz), Naxçıvan üzrə 98,7 milyon manat (16,4 faiz) təşkil edib.
Azərbaycanda 44 bank fəaliyyət göstərir.
