Azərbaycan, Qəbələ, 24 iyun /Trend, müxbir Zülfiyyə Qurbanova/
Rusiya Azərbaycanın poçt bankçılığı sahəsində təcrübəsini öyrənmək istəyir. Trend-in məlumatına görə, bunu Rusiya Federasiyası Dövlət Dumasının Maliyyə bazarı komitəsinin sədr müavini Dmitri Savelyev Qəbələdə V Azərbaycan-Rusiya Regionlararası Forumu çərçivəsində keçirilən "Rusiya və Azərbaycan banklarası əməkdaşlığının inkişafı" adlı "dəyirmi masa"da deyib.
Onun sözlərinə görə, Azərbaycanda bank biznesinin poçt bankçılığı kimi istiqamətinin inkişaf etməsini görmək çox xoşdur: "Biz hazırda bunun üzərində işləyirik, lakin Azərbaycan kimi uğurla deyil. Rusiya ərazisi böyükdür və ucqar rayonlar mövcuddur. Buna görə də biz "Azərpoçt" MMC-nin fəaliyyətinin təşkili baxımından Azərbaycanın təcrübəsini öyrənmək, bunu necə işlədiyini görmək və Rusiyada belə sistemin təşkili üzrə məhsulları əxz etmək istərdik".