Azərbaycan, Bakı, 27 iyun /Trend, müxbir Hüseyn Vəliyev/
Azərbaycanlı mütəxəssislərin yüksək səviyyəli ixtisası Azərbaycanda "BelAZ" yük avtomobillərinin yığılmasına imkan verəcək. Trend-in məlumatına görə, bunu cümə günü Bakıda mətbuat konfransında Belarusun Azərbaycandakı səfiri Nikolay Patskeviç deyib.
Onun sözlərinə görə, hazırda Belarus traktorları və digər texnikaların yığılması Gəncə Avtomobil Zavodunda həyata keçirilir, zavodda lokallaşmanın səviyyəsi 50 faizə çatır.
Səfir qeyd edib ki, hazırda əməkdaşlıq edilən strukturlar arasında Minsk Traktor Zavodu, Minsk Avtomobil Zavodu, Təkərli Yedəkçi Zavodu və Belarusun bir sıra digər müəssisələr var: "Azərbaycan Polad İstehsalı Kompleksi" QSC ilə imzalanmış sazişlərə əsasən bu sıraya daha bir müəssisə - "BelAZ" da daxil edilib".
N.Patskeviç əlavə edib ki, dünyada iriyüklü karxana texnikasını yalnız ABŞ, Yaponiya və Belarus istehsal edir: "Belarus bu sahədə dünya bazarının 30 faizini tutur. Mən çox şadam ki, Belarusun iri müəssisələrindən biri olan "BelAZ" Azərbaycanda digər böyük müəssisə ilə sistemli işə başlayır. Biz şübhə etmirik ki, bu müəssisənin yaxşı, böyük gələcəyi var. Şadıq ki, məhz Belarus onun inkişafı və dirçəlməsində, yekun nəticədə isə Azərbaycan iqtisadiyyatının inkişafında iştirak edəcək".