Azərbaycan, Bakı, 16 sentyabr /Trend, müxbir Azad Həsənli/
2014-cü ilin yanvar-avqust aylarında Azərbaycanda fəaliyyət göstərən 28 sığorta şirkəti tərəfindən 283,3 milyon manat mükafat toplanıb ki, bu da ötən ilin analoji göstəricisini 6,6 faiz (17,5 milyon manat) üstələyir.
Trend-in məlumatına görə, bunu çərşənbə axşamı mətbuat konfransında Azərbaycan Sığortaçılar Assosiasiyasının (ASA) rəhbəri Orxan Bayramov deyib.
Onun sözlərinə görə, 2008-2009-cu illərdən başlayaraq sığorta bazarının artım tempi yüksəlir: "Biz gözləyirik ki, ilin sonunadək artım tempi 6- 8 və ya 6 - 9 faiz arasında dəyişəcək".
Hesabat dövründə şirkətlər təqribən 103,5 milyon manat dəyərində sığorta ödənişləri həyata keçiriblər ki, bu da ötən ilin yanvar-avqust aylarının göstəricisindən 33 faiz (25,7 milyon manat) çoxdur.
Hər bir toplanmış 100 manat sığorta mükafatına 36,6 manat ödəniş düşür. Bu göstərici 2013-cü ilin yanvar-avqustunda 29,3 manat olub.
