Azərbaycan, Bakı, 16 sentyabr /Trend, müxbir Ümid Niayeş/
İranın rabitə və informasiya texnologiyaları naziri, Azərbaycan Respublikası ilə İran İslam Respublikası arasında iqtisadi, ticarət və humanitar sahələrdə əməkdaşlıq üzrə Dövlət Komissiyasının həmsədri Mahmud Vaezi gələcəkdə Azərbaycan-İran-Türkiyə müştərək iqtisadi komissiyasının yaradılmasının mümkün olduğunu deyib.
Trend-in İRNA agentliyinə istinadən verdiyi məlumata görə, iranlı nazir bu barədə Azərbaycanın İranda səfərdə olan iqtisadiyyat və sənaye naziri Şahin Mustafayevlə görüşdən sonra jurnalistlərə deyib.
Şahin Mustafayevin İrana ikigünlük səfəri bu gün başlayıb. Naziri səfərdə yüksək vəzifəli nümayəndələrdən ibarət iqtisadi heyət müşayiət edir.
İRNA-nın məlumatına görə, səfərdə iki ölkənin enerji, neft, qaz, gömrük, kənd təsərrüfatı və turizm sahələrində əməkdaşlığı muzakirə olunacaq.
Vaezi deyib ki, azərbaycanlı həmkarı ilə görüşdə siyasi və regional məsələlər üzrə müzakirələr aparılıb və hər iki tərəf əlaqələrin gücləndirilməsinin əhəmiyyətini vurğulayıb.
O, həmçinin bildirib ki, səfərdə Azərbaycan Prezidenti İlham Əliyevin İrana səfəri zamanı, həmçinin Azərbaycan və İran arasında iqtisadi, ticarət və humanitar sahələrdə əməkdaşlıq üzrə Dövlət Komissiyasının 9-cu iclasında əldə edilən razılaşmalar barədə müzakirələr aparılacaq.
Şahin Mustafayev bu gün İranın energetika naziri Həmid Çitçiyanla da görüşüb.
Görüşdə ölkələr arasında enerji sahəsində əməkdaşlıq muzakirə edilib.
İRİNN dövlət televiziyası Çitçiyana istinadən xəbər verir ki, görüşdə elektrik enerjisi mubadiləsi, Ordubad və Mazarad SES-lərin tikintisi məsələsi və bərpa olunan enerji sahəsində əməkdaşlıq müzakirə mövzusu olub.
İranlı nazir qeyd edib ki, hər iki tərəfin ekspertləri əməkdaşlıqların detalları haqqında müzakirələr aparırlar.
İRNA-nın məlumatına görə, ARDNŞ və "Azərenerji" ASC-nin rəhbər vəzifəliləri, Naxçıvan Muxtar Respublikası Ali Məclisinin sədr müavini, həmçinin Xarici İşlər, Nəqliyyat və Fövqəladə Hallar nazirliklərinin rəsmiləri də bu səfərdə iştirak edirlər.
Azərbaycan nümayəndə heyəti İranın kənd təsərrüfatı, iqtisadiyyat və nəqliyyat nazirləri ilə də görüşəcək.
