Azərbaycan, Bakı, 3 oktyabr /Trend, müxbir Azad Həsənli/
2014-cü il avqustun yekunu üzrə Azərbaycan regionlarında əhaliyə verilən kreditlər bankların kredit portfelinin ümumi həcmində 2 793,62 milyon manat, yaxud 16,1 faiz təşkil edib. Bu, ötən ilin analoji dövrünün göstəricisindən 56,4 faiz çoxdur. Trend-in məlumatına görə, bu barədə Azərbaycan Mərkəzi Bankının (AMB) 2014-cü ilin yanvar-avqust aylarının yekunu üzrə statistik hesabatında deyilir.
Hesabata əsasən, Bakıda bu göstərici 14 515,3 milyon manat təşkil edib ki, burada kreditlərin milli valyutada payı 10 498,5 milyon manat olub. Bu ilin avqustunda ölkədə kreditlər üzrə orta dərəcə 14,3 faiz, Bakı üzrə isə 13,1 faiz təşkil edib.
Mərkəzi Bankın məlumatına görə, Abşeron iqtisadi rayonu üzrə kreditləşmənin həcmi 18,7 faiz orta dərəcə ilə 552,47 milyon manat, Aran iqtisadi rayonunda 21,1 faiz orta dərəcə ilə 975,4 milyon manat, Dağlıq Şirvan - 111,22 milyon manat (23,6 faiz), Gəncə-Qazax - 376,91 milyon manat (21,5 faiz), Quba-Xaçmaz - 126,2 milyon manat (20,6 faiz), Lənkəran - 290,4 milyon manat (23,7 faiz), Şəki-Zaqatala - 157,11 milyon manat (20,5 faiz), Yuxarı Qarabağ - 70,71 milyon manat (20,1 faiz), Kəlbəcər-Laçın - 27,04 milyon manat (25,3 faiz), Naxçıvan iqtisadi rayonu üzrə isə 106,22 milyon manat (13 faiz) təşkil edib.
Sentyabrın 1-nə olan vəziyyətə görə, banklar tərəfindən 17 308,95 milyon manat kredit verilib ki, bu da ötən ilin analoji dövrünün göstəricisindən 19,74 faiz çoxdur.
Azərbaycanda 44 bank fəaliyyət göstərir.