Azərbaycan, Bakı, 17 oktyabr /Trend, müxbir Azad Həsənli/
2014-cü ilin sentyabrında Azərbaycanda istehlak mallarının qiyməti və xidmət tarifləri əvvəlki ayla müqayisədə 1,1 faiz artıb, 2013-cü ilin yanvar-sentyabr aylarına nisbətən isə inflyasiya 1,5 faiz təşkil edib. Trend-in məlumatına görə, bu barədə Dövlət Statistika Komitəsinin 9 ayın yekunları üzrə hesabatında deyilir.
Məlumata görə, 2013-cü ilin yanvar-sentyabr aylarında illik inflyasiya 2,3 faiz təşkil edib, sentyabr ayı ərzində isə 0,1 faiz səviyyəsində olub.
Avqustda ərzaq mallarının qiymətləri 0,1 faiz ucuzlaşıb, qeyri-ərzaq malları və xidmət tarifləri isə dəyişməz qalıb.
2013-cü ilin yanvar-sentyabr ayları ilə müqayisədə cari ilin 9 ayı ərzində ərzaq mallarının qiymətləri 1 faiz artıb, qeyri-ərzaq malları 3,6 faiz, xidmət sahəsində tariflər isə 0,4 faiz bahalaşıb.
Sentyabrda mal və xidmətlər çıxmaqla hesablanan, mövsümi dəyişikliklərə məruz qalan (meyvə və tərəvəzlər) istehlak qiymətlərinin bazis indeksi və dövlətin tənzimlədiyi qiymətlər əvvəlki ayla müqayisədə 0,1 faiz artıb, ötən ilin yanvar-sentyabr aylarına nisbətən isə monetar inflyasiya 1,8 faiz təşkil edib.
Məlumatda deyildiyi kimi, Azərbaycanda ərzaq məhsullarının qiymətləri müxtəlif istiqamətlərdə dəyişib: un, qarabaşaq yarması, toyuq əti, yumurta, günəbaxan və qarğıdalı yağı, alma, nar, üzüm, şabalıd, balqabaq, qənd və şəkər tozunun qiymətləri azalıb, düyü, makaron, qoyun və mal əti, balıq, kolbasa məmulatları, kərə yağı, limon, portağal, banan, ərik, gavalı, qarpız, qovun, qoz, fındıq, kələm, göyərti, xiyar, pomidor, bolqar bibəri, badımcan, lobya, çuğundur, kök, sarımsaq, baş soğan və kartofun qiymətləri isə bahalaşıb.
Habelə sentyabrda MDB ölkələrinə hava və dəmiryol sərnişin daşımaları tariflərində ucuzlaşma, beynəlxalq reyslərdə hava nəqliyyatı tariflərində bahalaşma müşahidə olunub.
