Azərbaycan, Bakı, 1 noyabr /Trend, müxbir Emil İsmayılov/
"Azərbaycan Xəzər Dəniz Gəmiçiliyi" QSC 2016-cı ilin birinci yarısında "Bakı Gəmiqayırma Zavodu" MMC-də istehsal olunan 3 sərnişin gəmisi alacaq. Bu barədə şənbə günü Trend-ə QSC-dən bildiriblər.
Hər birinin 80 nəfər tutumu olan 3 sərnişin gəmisinin tikintisi 2014-cü ilin mayında sifariş edilib. Cari ayda yeni gəmilərin korpusu üçün metal kəsiminə başlanılıb.
Mənbə bildirib ki, müqaviləyə uyğun olaraq və bütün işlər nəzərə alınmaqla gəmilər 18 ay ərzində sifarişçiyə təhvil verilməlidir.
Agentliyin müsahibinin sözlərinə görə, göstərilən müddət həm tikinti işlərini, həm də yeni gəmilərin sınaq dövrlərini nəzərdə tutur.
Bir müddət əvvəl "Bakı Gəmiqayırma Zavodu" MMC-nin baş direktorunun müavini İmamverdi Həsənov bildirmişdi ki, sərnişin gəmilərinin hər birinin qiyməti təxminən 8,5 milyon manatdır.
80 nəfərlik gəminin uzunluğu 38,22 metr, eni 8,2 metr, bortun hündürlüyü 4,18 metr, suya oturma dərəcəsi isə 2,25 metrdir. Yeni gəmilərin hərəkət sürəti 20 mildir. Gəmilərin bu xüsusiyyətləri sərnişinlərə təyinat yerinə tez çatmağa imkan verəcək. Bundan başqa, 50 tonluq yükgötürmə qabiliyyəti də sərnişin gəmilərinin müsbət texniki göstəricisidir.
