Azərbaycanın nümayəndə heyəti Daxili Audit Avropa Konfederasiyasının İllik Assambleyasında (European Confederation of Institutes of Internal Auditing- ECIIA) iştirak edəcək. Azərbaycanın Auditorlar Palatasının daxili audit bölməsinin müdiri Nigar Murtuzayevanın Trend ə verdiyi məlumata görə, tədbir oktyabrın 15 -də Kiprdə keçiriləcək.
Onun sözlərinə görə, Azərbaycan tərəfdən Assambleyada 1999-cu il iyunun 26-da təsis edilmiş "Azərbaycan auditi" ictimai birliyinin (rəhbəri Auditorlar Palatasının sədri Vahid Novruzovdur) üzvləri iştirak edəcək.
Assambleyada ötən il oktyabrın 9-da İstanbulda keçirilən təşkilatın Baş Assambleyasının yekunlarına həsr olunmuş məsələlər, Konfederasiyanın prezidenti İvz Çandelonun maliyyə hesabatı dinləniləcək, həmçinin auditor komitələrinin çıxışları, 2005-ci il biznes-planının təkmilləşdiriləsi üzrə məsələlər, eləcə də İdarə Heyətinin yeni üzvlərinin təsdiqi və 2005-2006-cı illərdə Assambleyanın yeni prezidentinin seçilməsi, növbəti iki il üçün biznes-planın və büdcənin təsdiqi, eləcə də 2006-2009-cu illərdə keçiriləcək görüşlərin yerinin və vaxtının təyin edilməsi və s. məsələlər müzakirə olunacaq.
Bu gün mənzil-qərargahı Brüsseldə yerləşən təşkilatın Azərbaycan və Litva da daxil olmaqla (bu ölkələr təşkilata 2004-cü ilin oktyabrında daxil olublar), Avstriya, Belçika, Bolqarıstan, Kipr, Fransa, Almaniya, Finlandiya, Yunanıstan, İslandiya, İtaliya, Rusiya, Tunis, Türkiyə və digər 32 ölkəni təmsil edən 31 üzvü var.