İran tərəfinin Ələt-Astara avtomobil magistralının bir hissəsinin yenidən qurulması layihəsinin maliyyələşdirilməsinə təklif etdiyi kreditin şərtləri Azərbaycan tərəfini təmin etmir. Bu barədə Trend ə Azərbaycanın nəqliyyat Nazirliyində bildirilib.
İran tərəfi $40 mln. həcmində kredit ayırmaq niyyətində idi. Bundan öncə İran layihənin TİƏ hazırlığı üçün $2 mln. həcmində qrant təqdim edib və hazırda bu, demək olar ki, başa çatdırılıb.
Nazirlikdə qeyd olunub ki, əgər İran tərəfi kreditin şərtlərini dəyişməsə, onda Azərbaycan bu kreditdən imtina edə bilər.
Bu layihənin ümumi dəyəri $350 mln. dəyərində qiymətləndirilir. Vəsaitin bir hissəsini - $200 mln. Dünya bankı (DB) təqdim edəcək. Asiya inkişaf bankı (AİB) daha $100 mln. ayıracaq. Bununla da DB-nin vəsaiti Ələtdən Masallıyadək, AYİB-in vəsaiti isə Masallıdan Astarayadək olan məsafədə yenidənqurma işlərinə sərf ediləcək.
Nazirlikdə qeyd olunub ki, zərurət yaranarsa, hər iki bank kredit vəsaitlərinin həcmini artırmağa hazırdır.
