Qara Dəniz Ticarət və İnkişaf Bank (QDTİB) bankın yeni iqtisadi şəraitdə strategiyasının hazırlandığını elan edib. Bu barədə, Trend agentliyinin məlumatına əsasən, bankın Azərbaycandan olan direktoru, maliyyə naziri Samir Şərifov bildirib.
"Belə bir vəzifə bankın menecmenti qarşısında qoyulub. Ehtimallara görə, həmin strategiyanın birinci variantı iyulda, dəqiqləşdirilmiş variantı isə sentyabrda təqdim olanacaq. Dekabr ayında İdarə Şurası bankın 2007-2010-cu illərə olan yeniləşdirilmiş strategiyasını və biznesini nəzərdən keçirəcək" - deyə S.Şərifov qeyd edib.
Onun sözlərinə görə, bu, QDTİB-ın ümumi strategiyası olacaq və onun əsasında ölkə strategiyalarına dəyişiklər ediləcək. Azərbaycan iqtisadiyyatı kreditlərin verilməsi baxımından tam kredit qabiliyyətlidir. Buna görə kredit xətlərini alan bankların sayının artırılması normal bir prosesdir.
QTİB də Azərbaycan Mikro-Maliyələşdirmə Bankının kapitallaşdırılmasını artırmağa hazırdır. "Bu layihə çox uğurlu alınıb, lakin digər sahələrdə də yeni layihələr olacaq" - deyə o vurğulayıb.
Bankın maliyyə məsələləri üzrə vitse-prezidenti Sofya Kasidova bugünkü biznes forumda deyib ki, Qara dəniz regionunda rəqabət qabiliyyətlilik artır və iqtisadi artım müşahidə olunur.
Bu gün bankın hesabına Qara dəniz hövzəsinə $600 mln. vəsait qoyulub. "Biz gələcək əməkdaşlıq mərhələsində əsas diqqəti ölkələrdə sənayenin inkişafına yönəltmək istəyirik" - deyə S.Kasidova vurğulayıb.
