Avqustun ortalarında Çinin Changan zavodunun istehsalı olan avtomobillərin yığılması üçün ilk hissələr Azərbaycana gələcək. Bu barədə Trend ə avtomobillərin yığılacağı Gəncə avtomobil zavodunun başçısı Xanlar Fətiyev məlumat verib. Yığılan avtomobillər "Gəncə" adlanacaq.
Müəssisədə 1 tondan 3,5 tonadək yük və yarımyük maşınlarının yığılacağı nəzərdə tutulur. Bu maşınların ilkin dəyəri 6-9 min AZN-dir.
X.Fətiyev qeyd edib ki, avtomobillərin yığılması zavodun 20 min kvadrat metr sahəyə malik yeni sexinin ərazisində həyata keçiriləcək. Bütün işlər müəssisənin vəsaiti hesabına gerçəkləşdirilir. Ancaq hazırda zavod öz avadanlıqlarını yenidən işə salır. Bu avtomobillərin bəzi hissələri müəssisənin özündə istehsal olunacaq.
Bu avtomobillərin təkcə Azərbaycan ərazisində deyil, həm də MDB ölkələri ərazisində də yayılması nəzərdə tutulur.