Azərbaycanın Ümumdünya Ticarət Təşkilatına (ÜTT) daxil olmasına hazırlıq üzrə Dövlət komissiyası avqustun 10-da dəyirmi masa keçirəcək. Hökümətdən Trend ə verilən xəbərə görə, görüşdə dövlət komissiyasının sədri Heydər Babayevin və danışıqlar işçi qrupunun başçısı Mahmud Məmmədquliyevin iştirak edəcəyi planlaşdırılır.
Görüş ÜTT -nin üzv ölkələri ilə danışıqlar prosesinə hazırlıq üzrə tədbirlərə dair ictimaiyyəti məlumatlandırmaq çərçivəsində keçirilir. Ehtimal olunur ki, 2 avqust 2006-cı il tarixli Prezident sərəncamı ilə təsdiq edilmiş qanunvericiliyin təkmilləşdirilməsi planı haqqında məlumat veriləcək.
Dövlət komissiyası avqustun sonuna- avqustun əvvəlinə qədər ÜTT-nin Cenevrədəki katibliyinə bu təşkilatın üzv-ölkələrinin suallara verdiyi cavabları göndərəcək. Azərbaycanın Ümumdünya Ticarət Təşkilatına daxil olması üzrə danışıqların I mərhələsinin keçirilmə müddəti 2006-cı il oktyabrın sonuna- noyabr ayına planlaşdırılıb.
Azərbaycan 1997-ci ildən etibarən bu təşkilatda müşahidəçidir. İndiyədək Azərbaycan ÜTT ilə 4 görüş keçirib. İlk iki görüş xarici ticarət rejiminin məsələlərinin müzakirəsinə həsr olunub, 2005-ci ildən isə son iki görüşdə ölkə tammiqyaslı danışıqlara başlayıb. İkitərəfli danışıqlar əmtəə və xidmətlərin Azərbaycan bazarına çıxarılma məsələləri, çoxtərəfli danışıqlar isə - kənd təsərrüfatının daxili dəstəyinə və bu sahədə ixrac subsidiyaları məsələləri üzrə aparılır.
Çoxtərəfli danışıqlar çərçivəsində suallar Kanada, ABŞ, Avropa İttifaqı, Türkiyə və Yaponiyadan təqdim olunub. İkitərəfli danışıqlara hazırlıq üçün isə ABŞ, Kanada, Aİ, Avstraliya, Yaponiya və Çindən suallar əldə olunub.
