2006-cı ilin yeddi ayı ərzində ticarət şəbəkələrindən əhaliyə 3,2 milyard manatlıq və ya ötən ilin müvafiq dövründəkindən 12,5 faiz çox istehlak malları satılıb. Trend Azərbaycan Dövlət Statistika Komitəsinə istinadən xəbər verir ki, mallarin 17,6 faizi hüquqi şəxslər, 82,4 faizi isə fərdi sahibkarlar tərəfindən realizə olunub.
Bundan əlavə, əmtəə dövriyyəsinin 2,1 milyard manatını ərzaq, 1,1 milyard manatını qeyri-ərzaq malları təşkil edib və onların satışı 2005-ci ilin yeddi ayı ilə müqayisədə müvafiq olaraq 9,7 və 18,5 faiz artıb.
Cari ilin əvvəlindən əhaliyə 725,1 milyon manatlıq və ya 37,3 faiz çox pullu xidmət göstərilib. Xidmətin 74,5 faizi hüquqi, 25,5 faizi fiziki şəxslərin payına düşüb və onlar tərəfindən əhaliyə uyğun olaraq 42,2 və 24,7 faiz çox xidmət göstərilib.