Azərbaycan Maliyyə Nazirliyi Dövlət Təkrar Sığorta Şirkətinin yaradılması ideyasından imtina edib. Nazirliyin Dövlət Sığorta Nəzarəti Şöbəsinin müdiri Namiq Xəlilovun Trend ə verdiyi məlumata görə, təkrar sığorta şirkəti kommmersiya xarakterli olmalıdır ki, bu sahədə fəaliyyəti üçün öz mənfəətini hesablaya bilsin, dövlətin isə barada iştirakı hazırda nəzərdən keçirilmir.
"Bu gün ölkə hüdudlarında şirkətlərin öz risklərini təkrar sığortalaması nəticəsində kapitalın azalması baş verir - sualın bu cür qoyuluşu ilə mən razı deyiləm. Çünki sərmayə qismində ölkə hüduduna çıxarılan pullar kapital hesab olunur, bu isə şirkətlərimizin xaricdə əldə etdikləri təkrar sığorta xidmətlərinə görə ödənişdir. Təkrar sığortalama məsələsində bizi pulların azalması deyil, daha çox etibarlılıq məsələləri maraqlandırır. Sığorta nəzarəti üçün başlıca vəzifə sığortaçının maraqlarını elə təmin etməkdir ki, sığorta şirkətləri istənilən vaxt öz öhdəliklərini yerinə yetirə bilsinlər", - deyə N. Xəlilov bildirib.
O hesab edir ki, təkrar sığorta nəticəsində 10 il ödəyib, amma bir ildə ödənilən vəsaitin 5 misli qədər əldə etmək olar.
Buna Nyu-Yorkdakı 11 sentyabr hadisələri - biznes mərkəzlərinin dağılması misal ola bilər. O zaman, ABŞ-ın iri maliyyə resurslarına malik olduğu bir halda, 70% vəsait Avropa təkrar sığortaçıları tərəfindən ödənilmişdi. "Bu, onu göstərir ki, diversifikasiya olmalıdır. Risklər bir yerdə toplanmamalı, əksinə parçalanmalıdır. Əgər biz təbii fəlakətlərlə bağlı bütün riskləri Azərbaycanda toplamış olsaq, onda yerlli şirkətlər bir birlərini təkrar sığortalamalı olacaqlar. Nəticədə isə onlar ödənişi həyata keçirə bilməyəcəklər, çünki hamısı bir hadisədə iştirak etmiş olacaqlar", - deyə Maliyyə Nazirliyinin təmsilçisi bildirib.
