Azərbaycanın maliyyə sisteminin modernləşdirilməsi üzrə ikinci layihənin hazırlanması ilə bağlı məsləhətləşmələr aparmaq üçün Dünya Bankının (DB) Azərbaycanda maliyyə layihələrinin rəhbəri S. Braoviç-Bratanoviçin başçılıq etdiyi missiyanın noyabrın əvvəlində Bakıya səfəri gözlənilir. Azərbaycan Milli Bankından (AMB) Trend ə verilən məlumata görə, artıq AMB həmin layihə ilə bağlı təkliflər hazırlayıb və onları DB missiyasına təqdim etmək üçün səfərə qədər bütün daxili məqamların razılaşdırılması nəzərdə tutulub.
Layihənin konsepsiyası ondan ibarətdir ki, DB layihəni həm maliyyə, həm də texniki yardım baxımından dəstəkləməyə hazırdır. Layihə çərçivəsində ölkənin bank (bank infrastrukturunun inkişafı) və maliyyə sektorları, kapital bazarının, əsasən, qiymətli kağızlar bazarının inkişafının dəstəklənməsi nəzərdə tutulur.
Layihənin dəyəri layihə qiymətləndirildikdən sonra müəyyən olunacaq. İlkin məlumatlara görə, bu, praktiki olaraq Beynəlxalq İnkişaf Assosiasiyasının (BİA) şərtləri əsasında ölkənin maliyyə sektorunun dəstəklənməsi üçün nəzərdə tutulmuş son kredit olacaq. Bu layihəyə 2007-ci maliyyə ili üçün (2006-cı ilin iyulundan başlayır və 2007-ci ilin iyunun 30-da başa çatır) təsdiq edilmiş limit çərçivəsində BİA-nın istifadə olunmamış vəsaitlərindən qalmış hissəni yönəltmək nəzərdə tutulub. Müvafiq olaraq, layihənin büdcəsi kredit resursları qalığı başa çatdıqdan sonra müəyyən olunacaq.
Azərbaycanın maliyyə sektoruna texniki yardım üzrə birinci layihəyə DB tərəfindən $5,4 mln. ayrılıb.
