Azərbaycan Maliyyə Nazirliyi 2007-ci il yanvar ayının ortalarına qədər Fitch Ratings beynəlxalq reytinq agentliyindən yeni suveren reytinq alacağını gözləyir, halbuki əvvəl reytinqin 2006-cı ilin sonunadək alınacağı ehtimal olunurdu. Nazirlikdən Trend ə verilən məlumata görə, agentliyin ekspertləri noyabrın sonunda ölkədə icmal aparıblar və bu səfər çərçivəsində onları maraqlandıran məsələlərlə tanış olublar.
2006-cı ilin əvvəlində Fitch Ratings Azərbaycanın xarici və milli valyutada suveren reytinqlərini BB səviyyəsində (2004-cü ildə olduğu kimi) saxlayaraq, proqnozun "stabil" olduğunu təsdiq edib. Eyni zamanda agentlik B səviyyəsində qısamüddətli reytinqi və BB - "ölkə tavanı" reytinqini təsdiq edib.
Ölkənin qiymətləndirilməsi 2005-ci ilin iyulunda Maliyyə Nazirliyi və Fitch Ratings agentliyi arasında imzalanmış üçillik müqavilə əsasında həyata keçiriləcək. Əldə olunmuş razılığa əsasən reytinq agentliyi 2005-07-ci illər ərzində suveren reytinqin verilməsi məqsədilə ölkədə icmal aparacaq. Fitch agentliyinin xidmətlərinin ödənilməsi üçün Maliyyə Nazirliyi hər il dövlət büdcəsinə təxminən 40 min funt/sterlinq qoyacaq.
Azərbaycan 14 sentyabr 2006-cı il tarixində ilk dəfə Moody's Investor Services ikinci beynəlxalq agentlikdən reytinq alıb. Agentlik ölkəyə Fitch Ratings agentliyinin versiyası üzrə reytinqdən bir pillə yuxarı və investisiya səviyyəsindən bir pillə aşağı suveren reytinq təqdim edib. Moody's agentliyinin qiymətləndirmələrinə görə ölkəyə Ba1 səviyyəsində reytinq verilib.
Hökümət 2007-ci ildə hər iki agentlikdən investisiya reytinqi alacağına ümid edir. Reytinq agentliklərinin xidmətlərinin ödənilməsi üçün 2007-ci il dövlət büdcəsinə 520 min manat keçirilib.