Azərbaycan, Bakı/ Trend müxbir İ.Xəlilova/ Azərbaycan Beynəlxalq Bankı (ABB) İdarə Heyətinin qərarı ilə Beynəlxalq Sığorta Şirkətinin (BSŞ) Sürixdəki törəmə şirkəti olan InterProtect Re AG təkrarsığorta şirkətinin fəaliyyəti dayandırılıb. Bu barədə bazar ertəsi bankdan məlumat verilib.
Bu onunla əlaqədar baş verib ki, İsveçrə parlamenti bu ölkədə fəaliyyət göstərən təkrarsığorta şirkətlərinin nizamnamə kapitallarının (NK) artırılması barədə qərar qəbul edib.
2007-ci il yanvarın 1-dən etibarən NK 5 mln. İsveçrə frankına qədər artırılıb (mayın 7-ə olan məzənnə ilə 1 CHF - 0,7139 manat. təşkil edir. 5 mln. frank - 3,579 mln. manat). InterProtect Re AG 2 il bundan öncə 1,2 mln. frank (0,857 mln. manat) Nizamnamə Kapitalı ilə yaradılıb.
"Problem ondadır ki, Azərbaycan qanunvericiliyinə əsasən törəmə sığorta şirkətinin Nizamnamə Kapitalı əsas şirkətin Nizamnamə Kapitalının 20%-dən çox olmamalıdır. Bununla əlaqədar olaraq hazırkı mərhələdə BSŞ-nin Sürixdə təkrarsığorta şirkətinin olması qanunvericiliyə ziddir",-deyə ABB-dən bildiriblər.
KPMG beynəlxalq şirkətinin auditinə əsasən isə, InterProtect Re AG şirkətinin fəaliyyəti kifayət qədər gəlirli hesab olunur.
İlin əvvəlinə Beynəlxalq Sığorta Şirkətinin Nizamnamə Kapitalı 8,8 mln. manatdır. InterProtect Re AG təkrarsığorta şirkətinin Nizamnamə Kapitalınınm göstərilən həddə qədər artırılması isə BSŞ-nin Nizamnamə Kapitalının 40,7 faizi deməkdir.
InterProtect Re AG 100 faiz BSŞ-nin təsisçiliyi ilə yaradlıb və tamamilə Azərbaycan Beynəlxalq Bankına məxsusdur.