Azərbaycan, Bakı / Trend / Yanvar-aprel aylarında Azərbaycanda ticarət şəbəkələri vasitəsilə əhaliyə 2,3 mlrd. manatlıq istehlak malları satılıb. Bu, ötən ilki göstəricidən 14,2 faiz çoxdur. Bu barədə Azərbaycanın Statistika Komitəsinin cümə axşamı günü yaydığı məlumatda bildirilir.
Ümumi məbləğdən 1512,2 mln. manat ərzaq, 810,4 mln. manat isə qeyri-ərzaq mallarının payına düşüb. Ötən illə müqayisədə bu növlər üzrə satışların artımı müvafiq olaraq 11,3 və 20,4 faiz təşkil edib.
Müvafiq müddət ərzində əhaliyə 623,2 mln. manatlıq pullu xidmət göstərilib. Bu da ötən ilki göstəricidən 33,5 faiz çoxdur.
Göstərilən xidmətlərin 74,9 faizi hüquqi, 25,1 faiz isə fiziki şəxslərin payına düşüb. Müvafiq olaraq artım 34,2 və 31,4 faiz təşkil edib.
Təşkil edilən yarmarkalar və bazarlarda pərakəndə satışın ümumi dövriyyəsindən 16,2 faiz hüquqi, 48,6 faiz isə fiziki şəxslərin payına düşüb. Yalnız 35,2 faiz özəl sahibkarların payına düşüb.
