Azərbaycan, Bakı/ Trend müxbir İ.Xəlilova / 2007-ci ilin birinci rübünün yekunlarına əsasən, Azərabaycan Beynəlxalq Bankının təmiz gəliri 13,595 mln. manat təşkil edib. Çərşənbə günü bankdan verilən məlumata görə, bu da ötən ilin müvafiq dövrü ilə müqayisədə 1,7 dəfə artım deməkdir.
Bankın mədaxili 2006-cı ilin birinci rübündəki 36,585 mln. manata qarşılıq 52,458 mln. manat təşkil edib. Bununla yanaşı Bankın faiz gəliri 36,078 mln manat təşkil edib ki, Bunun da 28,353 mln. manatı hüquqi və fiziki şəxslərə verilmiş kreditlər, 3,155 mln. manatı banklarda yerləşdirilmiş vəsaitlərdən gəlib.
Bank trərəfindən göstərilmiş xidmətlərə görə ABB 16,387 mln. manat komissiyon haqqı, plastik kartlarla aparılmış əməliyyatlardan isə 3,378 mln. manat qazanıb.
Hesabat dövründə ABB-nin xərcləri 38,863 mln. manat təşkil edib. Xərclər arasında bank tərəfindən borcların ödənilməsinə 11,41 mln. manat sərcf olunub ki, bu göstərici 2006-cı ilin birinci rübündə 7,5 mln. manat idi.
Birinci rübü ABB 1 821,147 mln. manat aktivlə başa vurub. Bu 2006-cı ilin eyni dövrü ilə müqayisədə 1,5 dəfə artım deməkdir.
Bankın kredit portfeli 1 355,735 mln. manat təşkil edib. Fizki şəxslərin əmanətləri də daxil olmaqla fiziki və hüquqi şəxslərin ümumi depozit həcmi 1581,136 mln. manat təşkil edib.