Azərbaycan, Bakı, 18 aprel/ Trend müxbir S.Əliyev/Xəzərin Azərbaycan sektorundakı "D-222 (Yalama)" perspektivli strukturunda ikinci kəşfiyyat quyusunun tikintisi bu ilin noyabrında başlayacaq. Qazma işləri Danimarkanın Maersk şirkətinə məxsus "Heydər Əliyev adına" qazma qurğusundan həyata keçiriləcək. Bu barədə cümə günü "LUKoyl-Volqoqrad NİPİmorneft" ASC-nin nümayəndələri məlumat veriblər. Bu ASC quyunun qazılması zamanı ətraf mühitə təsirlərin qiymətləndirilməsini aparıb.
Qazma işlərini kəşfiyyat layihəsinin, quyunun işlənməsinin və perspektivli blokun məhsulunun bölünməsinin operatoru Overseas Operating Company Ltd şirkəti həyata keçirəcək. İkinci kəşfiyyat quyusunun dərinliyi 2650 m təşkil edəcək. O, birinci kəşfiyyat quyusundan 22 km məsafədə, 690 metr dərinlikdə qazılacaq.
LUKOYL 2005-ci ildə "Yalama" -da 4400 m dərinlikdə birinci quyu qazıb. Quyunun layihə dərinliyi 4500 metrdir. Qazma işlərinin gedişində şirkət üçün kommersiya marağı kəsb etməyən kiçik həcmdə karbohidrogen ehtiyatları aşkar edilib.
Heydər Əliyev adına qazma qurğusu suyun qalınlığı 1000 m olmaqla 9 min metrədək dərinlikdə quyuların qazılması üçün nəzərdə tutulur. Xəzərin maksimal dərinliyi 1025 m təşkil edir və bu o deməkdir ki, qurğu onun demək olar ki, bütün akvatoriyasında işləyə bilər.
"Yalama" strukturunun işlənməsinə dair müqavilə 1997-ci il iyulun 36-də imzalanıb. D-222 bloku sahildən 30 km məsafədə, 80 metrdən 700 metrədək dərinlikdə, bərabər hissələrlə Xəzər dənizinin Azərbaycan və Rusiya sektorlarında yerləşir.
2003-cü ildə D-222 blokunda kəşfiyyat və blokun işlənməsinin əlavə şərtləri haqqında müqavilə paketi imzalanıb. Müqavilə paketi "LUKOYL" şirkətinin layihədəki payının 80 faizədək artırılmasını və müqavilə sahəsinin ərazisini 3 min. kv. km-dək artırmağı nəzərdə tutub. 2006-cı ildə müqavilə sahəsi 1,3 min kv. km-dək ixtisar edilib, kəşfiyyat dövrü isə 2009-cu il noyabrın 1-dək artırılıb.
Müəlliflə əlaqə saxlamaq üçün elektron ünvan: [email protected]
